జాజితీగకు సోగచిర్నవ్వు కోసం

వెన్నెలతో బాట వేసాను
తారకల దీపాల్ని అమర్చాను
పూలని దారి పొడుగునా పోసాను
నా గుండె గదికి రావడం
ఇక నీదే ఆలస్యం

జలపాతాల సంగీతాన్నీ
హరివిల్లు రంగుల చిత్రాలనీ
సవ్వడి లేని గాలి పాటనీ
తీసుకొచ్చాను
వాటిలో జీవం నింపగలిగినది
నువ్వు మాత్రమే

పూర్ణిమా సాయం చంద్రాగమనమూ
అమృతం కురిసిన రాత్రులూ
వార్షకాభ్రుకాలూ గ్రీష్మతాపమూ
శిశిర నిశీధులూ
నీ తోడు లేనపుడు
అసంపూర్తి కావ్యాలు

గుడి కోనేటి ఒడ్డున
మర్రి చెట్టు నీడలో
ఆడుకున్న వేసవి మధ్యాహ్నాలూ

గోదావరిలో పడుతున్న చినుకుల్ని
తన్మయంగా చూస్తూ
తడిసిపోయిన సాయంత్రాలూ

అరవిచ్చిన నందివర్ధనాలు
పూర్తిగా విరిసేంతవరకూ
ఆతురతతో యెదురుచూసిన ధనుర్మాసాలూ

అన్నీ

నీ కోసమా పొగడ నీడలో
యెదురుచూసిన నిరీక్షణ కంటె
చిన్నవే

ముద్దబంతి పూల కోసం
చెల్లాయిల కొట్లాటా
దేవుడి దగ్గర అమ్మ పాటా
కలిపి గుచ్చిన దండలా
అందంగా కవ్విస్తూ నువ్వు

శంకరుడి సౌందర్యలహరీ
కాళిదాసు కుమారసంభవమూ
చూపిన పార్వతి తప్ప
నీ అందాన్ని వర్ణించడానికీ సరిపోల్చడానికీ
మాటల్లేవ్

నీ సోగ చిర్నవ్వు విరిసే
వొక్క క్షణాన్ని
నాకియ్యి

నీ దర్శన భాగ్యాన్ని
నా యింటి కిటికీనల్లుకున్న
జాజితీగకియ్యి

(ఆంధ్రప్రభ)